Тансел Терджан
Қазақстанда өтетін халықаралық Expo 2017 көрмесіне дайындықпен өткен қарбалас екі жыл артта қалды. Осы уақыт ішінде Астана әлемнің түрлі
елдерінен маңызды қонақтарды қабылдап жатыр. Rixos President Hotel Astana осындай ауқымды шараға қалай дайындалғанын бізге айтып берсеңіз?
EXPO – жұртшылықты ақпараттандыруды, жаңалықтармен бөлісуді, прогресті ынталандыруды және ынтымақтастықты дамытуды мақсат ететін жаһандық шара. Оны басқа елдерді, компанияларды, халықаралық ұйымдарды, жеке мекемелерді, белгілі тұлғаларды және кең халық қауымын шараға қатысуға шақыратын қабылдаушы ел ұйымдастырады. Ең жоғары деңгейдегі шешім қабылдаушылардан балаларға дейін қамтитын қатысушылардың алуан түрлілігінің арқасында EXPO ерекше көрмелер, дипломатиялық байланыстар, іскерлік келіссөздер, ашық пікірталастар мен тірі қойылымдар бір мезгілде өтетін көпқырлы шара ұсынады.
Бұл EXPO-лардың шын мәнінде бірегей шаралар болуының себебі – олардың адамзаттың түйінді мәселелеріне шешім табу үшін бүкіл әлемді бір арнаға тоғыстыруында. Rixos President Astana әлемдегі ең маңызды саяси бейбітшілік конференцияларының бірі – Астана процесін төрт ай бойы қабылдаумен қатар, қонақүй ретінде бірінші дәрежелі орналасу артықшылығына ие.
Біз EXPO 2017-ге және одан кейін басталатын Әлемдік қаржы-сауда орталығына, сондай-ақ Жібек жолының басқа да сауда жобалары мен форумдарына дайынбыз.
Қабылдаушы тарап EXPO 2017-нің тақырыбы ретінде болашақтың энергия көздерін таңдай отырып, тұрақты энергетиканы ынталандырумен қатар халықаралық қауымдастықты саясаттағы өзгерістің қажеттілігі жөнінде хабардар етуді жоспарлап отыр. Энергия көздеріміздің болашағында тек осындай бірлескен күш-жігер ғана өзгеріс жасай алады; сондықтан көрме үшін «болашақ энергиясы» тақырыбы таңдалды. Тақырыптың мақсаттары мыналар:
- Тұрақты энергетиканы дамыту саласындағы ең үздік халықаралық тәжірибелерді ынталандыру
- Таза энергия саласындағы ғылыми-технологиялық жетістіктерді ынталандыру
- Энергияның болашағы туралы білімді барлық мүдделі тараптармен – қатысушы жұртшылықпен, академиялық мекемелермен, өнеркәсіп кәсіпорындарымен және басқа да ұйымдармен бөлісу
- Болашақтың энергия көздеріне қатысты мүмкіндіктер, қиындықтар мен сұраныстар жөнінде хабардарлықты арттыру
- Өнер, мәдениет және ойын-сауық арқылы білім беру мен оқытуды ынталандыру
- Жасыл, салауатты және тұрақты болашақ құруды мақсат ететін заманауи технология мен білімді тарату үшін инновациялық алаң құру
- Экономикасы қарқынды дамып келе жатқан Қазақстанды тұрақты даму үлгісін ұстанатын ел ретінде таныту
Астана – Қазақстанның қаржылық және саяси астанасы. Rixos President Hotel-дің осы өңірдегі маңызы мен ықпалы туралы не ойлайсыз?
Біздің бірінші кезектегі міндетіміз – көрме кезінде қаланың жүздеген мың келушінің қажеттіліктерін өтей алуын қамтамасыз ету, және көрменің табысы Астанаға ұзақ мерзімді тұрғыда әсер ететінін жақсы түсінеміз. Басынан бастап EXPO 2017-ні 2050 жылға қарай әлемдегі ең қуатты экономикалардың біріне айналу жолындағы талпынысымызда бізге көмектесетін зор мүмкіндік ретінде қарастырдық.
ASTANA EXPO 2017 ТҰРАҚТЫ ЭНЕРГЕТИКАДА ЖАҢАЛЫҚ ТУДЫРЫП, ЖІБЕК ЖОЛЫНДАҒЫ ДАМУДЫҢ ОСЫ ҒАСЫРДА АЛА КЕЛЕТІН ӨЗГЕРІСТЕРІНЕ ЖОЛ АШАДЫ.
Біздің мақсатымыз – биылғы EXPO-ны тұрақтылыққа, әртараптандыруға, технология мен дағдыларға басымдық бере отырып, өнеркәсіптік дамуымыздың келесі кезеңіне өту үшін пайдалану. Көрме аумағында саланың қалған бөлігіне үлгі болу үшін ең жаңа жаңартылатын энергия көздері, ақылды желілер және тұрақты құрылыс әдістері қолданылады.
Сондай-ақ аумақ көрме жабылғаннан кейін де ұзақ уақыт бойы пайдаланыла беретініне сенеміз. Жасыл технологияларды дамытудың халықаралық орталығы сияқты басқа да форумдар мен БҰҰ қамқорлығындағы инвестициялық жобалар осы аумақта қабылдана береді. Нысан сонымен қатар құрылымы жағынан Дубайдағы баламасына ұқсас етіп дамытылып жатқан «Астана» халықаралық қаржы орталығының да жаңа мекеніне айналады. Осы аумақтың айналасында салынып жатқан жаңа, заманауи инфрақұрылым мен тұрғын үй кешендерімен бірге бұл жер елордамыздағы жаңа әрі тыныс-тіршілігі қайнаған ауданға айналумен қатар технологиялық компаниялар, ғылыми-зерттеу орталықтары және академиялық мекемелер үшін тұрақты мекен қызметін атқарады.
Болашақта Rixos-та қонақтарымызды қандай тосынсыйлар күтіп тұр?
Халықаралық беделімізді арттырып, елордамыздағы нысандарды жетілдіру арқылы EXPO ’17-нің Қазақстан туризміне де ұзақ мерзімді серпін беретінін күтеміз. Астана – ерекше табиғи сұлулыққа ие мекен, және көрме келушілерге қаланың ұсынатын бар игілігін көрсетуге көмектеседі деп үміттенеміз.
EXPO 2017-нің есігін алғаш ашуына бір жылдан аз уақыт қалды. Әлемімізді тұрақты түрде энергиямен қалай қамтамасыз ететінімізге назар аудара отырып, осы ғасырдың басты мәселелерінің біріне шешім табуда өз үлесімізді қосып жатырмыз. Сондықтан түрлі елдерден көптеген компаниялар мен адамдардың биыл жазда Астанаға келетініне үміттенемін. Олар ең жылы қарсы алуға кенелетініне сенімді бола алады.
Rixos Magazine оқырмандарына не айтқыңыз келеді?
Astana Expo 2017 тұрақты энергетикада жаңалық тудырып, Жібек жолындағы дамудың осы ғасырда ала келетін өзгерістеріне жол ашады.
Ағылшын тіліндегі түпнұсқасынан аударылған.